الخميس، 4 يوليو 2013

النهاردة فرحة

النهارده فرحة
شعبنا قدر يتحرر من نظام كان عاوز ياخده للهاوية
منظر الناس في الشوارع وهما فرحانين بيخليني أزعل أوى إنى ماكنتش بعرف أنزل
أنا مستغربة جدا من الناس اللى مش عارفة تفرح علشان خايفة من اللى جاى
أنا عارفة إن اللى جاى مجهول بس صدقوني اللحظات دى صعب تتكرر
إفرحوا وعيشوا اللحظة وخليكم مبسوطين
لازم نفتخر بجد إننا مصريين
وللناس المؤيدين احب أقول لكم إن الناس نزلت الشوارع علشان مرسى رئيس فاسد
مش علشان هو رئيس متدين ولا علشان هو من الإخوان
تفتكروا لو كان مرسى صلح أحوال المواطن البسيط كان هينزل يهتف ضد مرسى
تفتكروا لو كان عمل عدالة اجتماعية حقيقية ووفر فرص عمل وعدل اقتصاد البلد
كان الشعب نزل وقال يسقط مرسى
واللى مش مقتنع بكلامى يقولى مرسى أنجز إيه في السنة اللي قعد فيها
سواء على مستوى الشريعة أو على مستوى الاقتصاد
ده بالعكس
كل حاجة عندنا بقى فيها أزمة
حتى أزمة سد النهضة ماقدرش نظامه يعمل فيها حاجة غير بس إنهم قعدوا يشتموا في عبد الناصر ويقولوا إن السد العالي كان غلط
وأخيرا ..مرسى صحيح كان رئيس عن طريق انتخابات
بس الناس اللى نزلت الشوارع ضده أضعاف عدد اللي انتخبوه
كمان ماننساش عن في ناس انتخبته ونزلت ضده
المهم نفرح وننبسط إن ربنا وقف مع مصر ونجاها
علشان نركز هنعمل إيه الفترة اللي جايه.
 
 

هناك 16 تعليقًا:

  1. حسبى الله ونعم الوكيل فيهم والحمد لله انزاحت الغمة الف حمد وشكر ربنا يلطف فى الجاى يارب

    ردحذف
  2. انا خايفة يا نهي ومش مطمنة

    ردحذف
  3. مارو
    الحمد لله كده كفاية أوى وربنا يستر

    ردحذف
  4. رحاب
    إفرحى النهاردة وخافى بكرة

    ردحذف
  5. الحمد الله على كل حال وربنا ان شاء الله هينصرنا
    والمخاوف اللى داخل كل حد فينا من اللى جاى
    ان شاء الله تكون اجمل مما نتوقع
    ياااااااااااااااااارب
    :))
    سعيدة بمدونتك
    تقبلى مرورى

    ردحذف
  6. مفيش شعب عظيم تسوء أخلاقه عشان يثور ,, للأسف محناش شعب عظيم عشان كان فى مهازل أختلاف فى الرأي كانت بتخلى كل الناس تشتم فى بعض كلا الجنبين بيشتموا فى بعض و بيدعوا على بعض
    إحنا شعب معندوش ثقافه الأختلاف فى الرأي بأدب و أحترام
    فبلاش نضحك على نفسنا و نقول شعب عظيم رجاء


    غير كده ربنا يصلح البلد و يولى الصالح و نعدي المرحله الصعبه :)

    تحياتي لكي :)

    ردحذف
  7. أميرة أحمد
    إن شاء الله ربنا يكملها على خير
    نورتى

    ردحذف
  8. ياسمين جمال
    لا يا ياسمين أنا عند رأيى إحنا شعب عظيم
    عندنا ثقافة الإختلاف صعبة أيوة معاكى حق
    لكن اللى يعمل اللى عمله المصريين
    مايتقالش عليه غير شعب عظيم

    ردحذف
  9. بتتكلمى بلسان حالنا يا نهى
    إحنا مبسوطين بس خايفين :(

    يارب يتممها بخير ويفرحنا بقدوم رئيس يصلح الحال بجد .

    ردحذف
  10. مين اللى يقدر ساعه يحبس مصر؟؟

    كانت غمه و انزاحت...خايفين اه بس مبسطوين و بنتوكل على الله

    ردحذف
  11. ماحدش يقدر ينكر إنه خايف من بكره
    بس ماينفعش نعدي الفرحة دي من غير ما نعيشها
    لأننا فعلاً نستحقها
    مرسي ونظامه هو اللي جنا علي نفسه
    لأنه ماتعلمش إن الشعب يقدر يوصل لكل حاجه تحافظ علي انسانيته حتي لو كل يوم هيشيل رئيس
    مبروك علينا:)

    ردحذف
  12. فدوى
    ربنا يعديها على خير يارب

    ردحذف
  13. د/ دودى
    محدش يقدر يحبس مصر
    معاكى كل الحق
    نورتى

    ردحذف
  14. بنت من الزمن ده
    فعلا لازم نفرح علشان نركز في اللى جاى

    ردحذف
  15. ربنا يعمل اللى فيه الخير يارب

    ردحذف
  16. حنان وحنين
    ان شاء الله
    ربنا يحفظ مصر

    ردحذف

قول اللى يعجبك ، ممكن تتفق معايا أو تختلف بس كله في حدود اللياقة والأدب