قررت مي في "ساعة مايعلم بها الا ربنا" أن تهاتف احدي صديقاتها و بعد السلامات باغتتها صديقتها بسؤال مفاجئ
-سمعتي أغنية دنيا سمير غانم الجديدة ؟
-لا لسة ماسمعتهاش هي حلوة؟
-يااااااااااه مفيش كلمات أحلى من كده الأغنية بتجسد كل معاني الحب.
-طيب هروح أسمعها و أرجعلك...
بعد قليل قامت مي بالاتصال بصديقتها ودار بينهما حديث طويييييييييل :
- ايه يا بنتي ده...ايه الاغنية دي
-عجبتك مش كده
-لا طبعا هو الكلام اللي في الغنوة دي عجبك يعني انتي ازاي كده؟
-يا بنتي انتي بس اللي مابتعرفيش تحبي
-لو الحب كده يبقى يغور انا مش عاوزة احب حد ولا حد يحبني
- هو انتي بس ايه اللي مش عاجبك فيها ؟
-كلها مش عاجباني كلمات الاغنية استفزتني بشكل مبالغ فيه يعني ايه واحدة تقبل ان حد يطلع لها فجأة كده ويخليها تغير طريقة لبسها وتسيب صحابها اللي بتحبهم وبعدين تعليمات ايه اللي هتنفذها يعني..هو ده حب ولا معسكر كشافة
أطلقت الصديقة ضحكة مصطنعة تدل على "الغيظ الشديد" وقالت:
-يعني انتي بقى عاوزة تفهميني انك لما تتجوزي مش هتسمعي كلام جوزك وهتلبسي اللي على مزاجك وتصاحبي ولاد يعني ولا ايه انتي فاكرة نفسك عايشة في انجلترا؟
-لا يا متخلفة.. انتي اللي فاهمة إنك عايشة في عصر الحريم وتقريبا كده كان نفسك تبقى واحدة من حريم السلطان وبعدين تعالي هنا هو انتي فاهمة ان اللي هيتجوزك ده لازم يتحكم فيكي ويعيد لك ترتيب حياتك من جديد؟
-أكيد من حقه يعني يقول اللي شايفه صح مش جوزي وهبقى مسؤولة منه ولا يعني يسيبني كده من غير ما يشكمني؟
-يشكمك إيه!! يعني انت مستنية واحد ييجي يعمل لعقلك Format ويبرمجك من جديد على كيفه طيب لما هو كده بقى ليه ماشفش واحدة جاهزة و متبرمجة بدل ما يتعب نفسه و يشتغل من الأول، يعني تفتكري انك من غيره هتنحرفي وتروحي تعرفي ولاد ولا انتي تربيتك تمنعك من كده؟ وتفتكري لبسك لو مش عاجبه من البداية ايه اللي هيخليه يتقرب منك علشان يرتبط بيكي ؟، كمان لو صحباتك مش عاجبينه ايه اللي هيخليه يعرفك ويكمل معاكي أساسا وهو عارف ان دول كانوا صحباتك وانتي أكيد زيهم أو حتى تفكيرك قريب لهم...انتي مش مقتنعة ان كل ده مجرد محاولات لفرض السيطرة والتحكم مش أكتر وان كل ده مالهوش علاقة بالحب..طيب لو في واحد صاحبه عرفتي انه بيخون مراته مثلا و قولتيله ماتعرفهوش تاني تفتكري هيسمع كلامك وهيبقى مقتنع انك بتحبيه وخايفة عليه ولا هيشوف ان مش من حقك تتحكمي فيه؟
-!!!!!!!!!!!
-طبعا مش عارفة تردي واللي زيك لما هتتجوز مش هتخلف لنا غير واحد معقد ومريض نفسي زيك انتي و أبوه بالظبط وهتفهميه انه سيد الكل ويكبر ويطلع عقده على واحدة مسكينة تانية...ولا مسكينة ليه أكيد برضه هتبقى واحدة مريضة زيك وعندها هوس بإنها تفضل مجرد تابع علشان مجتمعها فهمها الحب والجواز غلط.
-انتي ازاي تكلميني كده أصلا...أنا مش عاوزة أعرفك تاني يا مي انتي معقدة
-أنا اللي معقدة ولا انتي اللي جاية من عصر البخار انا اللي مش عاوزة أعرفك تاني.
وتغلق مي السماعة بشدة وتذهب لتسمع أغنية ثورة نسائية
ومع انتهاء اليوم كانت قد انتهت العديد من الصداقات بسبب هذه الأغنية.
