بيقولك الاكوادور تستدعى سفيرها لدى مصر للتشاور
بيقولك مجلس الأمن انعقد لمناقشة الوضع في مصر
بيقولك إيطاليا تستدعى سفير مصر بروما للتنديد بأحداث العنف
بيقولك تركيا تطالب بعودة مرسي رئيسا للبلاد
هو في إيه؟
مال الدول دى جالها فجع مرة واحدة كده
هو انت فاكر ياحلو انت وهو إن البلد دي ممكن حد يوقعها
ده إحنا زمان في كتب التاريخ كانوا بيقولولنا عليها مقبرة الغزاة
يعنى حتى لو دخلتوها مش هتخرجوا منها صاحيين
واد يا أوباما
إنت مش واخد بالك انك نحس يا حبيبي
جبت ضلف 3 دول سوريا وليبيا وتونس
عاوز إيه من مصر يا حبيبي؟
ماهى امريكا كده تعمل المصيبة وترجع تعيط...
بس اتضح انها بتعمل المصيبة قاصدة علشان لما تعيط تصعب على الناس ويبقى فى مبرر لكل الحماقات اللى بتعملها
طيب بص يابنى انت و أصحابك
البلد دى مش اللي يسوى واللي مايسواش هييجي ياخد منها حتة
ليه؟
علشان مصر مش تورتاية يا بابا هتقسموها عليكم
وكل واخد ياخدله حبة كريمة على شوية كريز زى ما العيال الصغيرين بيعملوا
مصر تورتاية حلوة لأهلها و الناس اللى منها وبيحبوها
لكن ليك انت و أصحابك تبقى علبة كشري...تعرفه؟
أيوووووووة اللي بعدس ومكرونة ده..شاطر ياحبيبي
يعنى مسافة ما هتاخد منها معلقة هتفضل تتنطط شهر قدام من الشطة
يعنى هيجيلك حموضة ومفيش دوا هينفع معاك علشان إنت مش متعود على كده
يعنى ممكن يجيلك تلبك معوي انت والمفجوعين اللي معاك
يعنى عقلك في راسك يا بابا
علشان عمر البلد دى ما هتبقى تحت إيدك ولا إيد الأحسن منك مهما عملتوا
ربنا يحفظ مصر ويبعد عنها كل اللى زيك
مصر المحروسة غصب عن عين اى حد عايز يولع فيها
ردحذفجميل جدا أن اول دخول لى على مدونك قابلت موضوع جميل زى ده
ردحذفومصر عمرها مكانت تورتة لحد انما للأسف كانت منهوبة والتدخل الاوروبى والامريكى كل منهم حفاظا على مصالحة مش علشان حقوق الأنسان والكلام الى بيقولوه
وكلنا بنتمنى لمصر الخير والرخاء وربنا يحميها ويحى قواتنا المسلحة
شكرا لكم
ردحذفنورتونى :)